Aqmescitteki Rusiye İç işler nazirliginiñ idaresi Rusiye Federatsiyası Devlet dumasınıñ sabıq Qırım deputatı, 2016 senesi oktâbr ayından 2021 senesi oktâbr ayına qadar milletlerniñ işleri komitetiniñ reis muavini olğan Ruslan Balbekni qıdıruvğa ilân etti. Bu aqta Qırımdaki Rusiye İç işler nazirliginiñ matbuat hızmeti haber ete.
Bu ilânda «Krımenergo» Rusiye müessisesiniñ sabıq baş müdiri Andrey Tsurkanenkonıñ da qıdırılğanı aqqında haber etile.
«Aqmescit şeerindeki Rusiye İç işler nazirligi idaresiniñ polis hadimleri bu vatandaşlarnı qıdıra: Balbek Ruslan İsmailoviç, 28.08.1977 doğma, Krılov Sergey Viktoroviç, 17.09.1960 doğma», – dep aytıla haberde.
Olarnı angi maddege köre qıdıralar Rusiye İç işler nazirligi bildirmey. Açıq zaatları yoq.
Balbek 2014 senesinden 2016 senesine qadar Qırımnıñ Rusiye ükümetinde baş nazir muavini edi. Soñra VII çağırılış Rusiye Federatsiyası Devlet dumasınıñ deputatı olıp, 2021 senesi oktâbr ayına qadar Rusiye parlamentiniñ milletler işleri komitetiniñ reis muavini edi.
Andrey Tsurkanenko 2021 senesi avgust ayından 2023 senesi sentâb başına qadar «Krımenergo» yolbaşçısı edi. «Krımenergonıñ» sabıq yolbaşçısı vekâletlerinden tış areket etkeninde qabaatlanıp apiske alınğan edi. Haber etilgenine köre, qurğan shemasında elektrik energiyası sayğıçlarını teşkergen resmiy olmağan bir komissiya şekillendirilgen edi. Neticede qullanıcılarğa büyük borclar kele edi.
